د شهيد ستر جنرال عبدالرازق اڅکزي د شهادت څلوېښتمه ورځ د قران کريم په ختمونو او تر څنګ يې د يوې لويي غونډي په جوړولو سره ولمانځل سوه .

د دوشنبې په ورځ د شهيد ستر جنرال عبدالرازق اڅکزي د شهادت څلوېښتمه ورځ په کندهار ولايت کي د قرآن کريم د ختمونو او د هغه د ارمانونو د پوره کېدلو په موخه د سولي اړوند يوه لويه غونډه هم جوړه سوه، چي پرمهال يې مرستيال او سرپرست والي عبدالحنان منيب، د ولسي جرګې لومړی مرستيال او غړي يې، په هند هيواد کي د افغانستان مخکنی سفير، د ولايتي شورا رئيس او غړو يې، د دولتي ادارو رئيسانو، تجارانو، د هلمند، زابل او اروزګان ولايتونو دولتي، قومي او ولسي مشرانو، د دغه ولايت زيات شمېر ځوانانو، قومي مشرانو، او مدني فعالانو برخه اخيستې وه .
په غونډه کي د شهيد ستر جنرال عبدالرازق اڅکزي پر کارنامو، لاسته راوړنو او د هغه ارمان چي سوله وه پر راوستلو يې هر اړخيزه بحثونه وسول .
په دغه غونډه کي مرستيال او سرپرست والي عبدالحنان منيب وويل : شهيد ستر جنرال عبدالرازق زړور او سپېڅلی جنرال وو چي د اولس په خدمت کي يې خپل سر قرباني کړ او يادونه او کارنامې به يې هيڅکله د کندهاري اولس هېري نسي .
ښاغلي منيب وويل : شهيد ستر جنرال د امنيت ترڅنګ په ولسي او ټولنيزو برخو کي ځانګړی رول درلود او د خپل اولس لپاره يې په پوره مېړانه وخت پر وخت خدمت ته دوام ورکړی وو .
نوموړي وويل : د شهيد يوازينی لوی ارمان سوله وه چي په دغه برخه کي يې هر وخت هڅه کړې وه او د امکان ترحده يې خپل مسؤليټ اداء کړی وو، د هغه د دغه ارمان په پوره کولو کي بايد ټوله په ګډه سره پوره هڅه وکړو چي نوموړي موخي ته رسېدلي او د شهيد ارمان مو پوره کړی وي .
مرستيال والي پر ټولو اولسونو او قومي مشرانو باندي ږغ وکړ چي د خپل وطن د ابادۍ لپاره سره يو موټی او يوځای سئ ترڅو د افغانستان ناخوالو ته مو د پای ټکی ايښی او په بيارغولو کي يې ټولو خپل مسؤليت په ښه ډول اداء کړی وي .
په غونډه کي د ولسي جرګې لومړي مرستيال او غړو يي، په هند هيواد کي د افغانستان مخکني سفير، د ولايتي شورا رئيس او غړو يې، د کندهار، اروزګان. زابل او هلمند قومي او ولسي مشرانو هم خبري وکړې او ويې ويل : شهيد ستر جنرال عبدالرازق اڅکزی د ټوله افغانستان شهيد دی چي نوم او کار نامې به يې د تل لپاره ژوندۍ پاته وي، نوموړو زياته کړه : د هغه د ارمانونو په پوره کولو کي به پوره هڅه کوو ترڅو په هيواد کي مو تلپاته سوله راغلې او اولس مو د امن په فضاء کي د ارامۍ او هوسايني له ژوند څخه برخمن سوي وي .
وروسته په غونډه کي قومي مشرانو د مرستيال او سرپرست والي عبدالحنان منيب هڅي هم وستايلې چي په سخت حالت کي يې د کندهار حالت کابو کړی، همدارنګه يې د امنيتي ځواکونو هڅي هم وستايلې چي د امنيت په برخه کي يې د خپلو هيوادوالو لپاره نه ستړي کېدونکي هلي ځلي کړي دي .
د کندهار ولايت مقام مطبوعاتي دفتر
ورځ : دوشنبه
نېټه : ۰۵ / ۰۹ / ۱۳۹۷